Два квадратни метри станбена површина во некој од градовите во внатрешноста на земјава вредат колку еден квадратен метар стан во Скопје.
Анкетите на инвеститори на станбени згради и на трговци од еснафот на агенциите за недвижен имот покажуваат дека цената на квадратен метар половен стан во поширокото централно градско подрачје во Скопје останува повисока од цената на нов станбен квадрат во Штип, Кочани, Велес, Кавадарци, Гевгелија, Струмица или во Кичево и некој од другите средни градови во земјава. Единствено цените на новите станбени градби во Охрид, доколку се на атрактивна локација достигнуваат цени од 1.000 евра за квадратен метар, а тоа може да се случи и во Битола, но многу поретко.
Искуствата на агентите кои посредуваат при трговија со недвижен имот во големите градови во Полог велат дека многу се барани деловните простори, додека становите не се многу посакувана стока за инвестирање и нивните цени зависат од ситуација до ситуација и не надминуваат 900 евра.
Во Скопје бизнисот паѓа, но уште е двојно подобар од внатрешноста
Скопските агенти за посредување при продажби со недвижности потенцираат дека паѓа интересот за купување стари станови во Скопје, но дека тоа не важи за новоградби на елитни локации кои се купуваат уште во текот на изградбата. За половните станови велат дека има големи ценовни осцилации од случај до случај и дека остануваат најниски цените на половни станови во скопските населби Ѓорче Петров, Ченто, Кисела Вода и Припор и за сите заедничко е што се пониски од 900 евра за квадратен метар. Становите во Аеродром, Карпош, Козле, Тафталиџе ретко се под 1.000 евра за квадратен метар, а често се и до 1.200 евра во зависност од локацијата, материјалот од кој се изградени, соседството и комукациските врски.
Атрактивните локации во Центар или на Водно кои се новоградби често се плаќаат однапред и не може со сигурност да се формира генерална пазарна цена , но според процените се движат од 1.500 до 1.900 евра за квадратен метар во зависност од условите и фазата на изградба. Агентите велат дека најатрактивни и најпосакувани бизниси се трговија со неизградено градежно земјиште во центарот на Скопје, пред се заради тоа што секоја градба има сигурни купувачи и лесно се тргува.
Охрид пред Битола и Куманово
Охрид е единствениот град кој отскокнува од другите населени места во внатрешноста заради тоа што нов станбен квадрат достигнува и надминува цена од 1.000 евра. Нормално во зависност од локацијата, комуникациските врски и соседството. Значаен прогрес во однос на другите мали градови достигнуваат цените на станбен квадрат во Струга. Според достапните информации цените достигнуваат и до 800 евра за квадратен метар новоградба што е скок од 20 отсто во споредба со цените во последниве пет години. На тоа ниво се и цените на новоизградените станови во Битола , кои според трговците, речиси никогаш не достигнуваат ни 1.000 евра и се движат во маргина од 700 до 900 евра за квадратен метар зависно од локацијата, содржините и квалитетот на градбата.
Нивото до 800 евра за нов квадратен метар го достигнува и Струмица како најсилен економски центар во источна Македонија, чија најсилна конкуренција е Штип како најбрзо растечки регион во овој дел на земјава. Таму новоградбите во зависност од локацијата и квалитетот на понудата се движат од 600 до 700 евра иако има попусти за плаќање во готово. Во Кочани оваа ценовна маргина е пониска за 100 евра, а во Виница и Берово не може да се формира цена зашто понудата и побарувачката се многу мали и се стихијни.
Во централниот дел на земјава највисоки цени за новоградби има Велес, иако цените се разликуваат во нијанси во однос на Кавадарци, Неготино и Гевгелија. Во Велес, според инвеститори, цените за нов станбен квадрат не можат да достигнат 800 евра, но не се пониски ниту од 700 евра на квадрат. Во Кавадарци искуствата од последните две години покажуваат дека цените достигнуваат до 650 евра, но почесто се до 600 евра за квадратен метар, а слична е состојбата во Неготино и во Гевгелија.
За сите овие населени места е заедничко тоа што се слаби понудата и побарувачката и цените зависат пред се од условите за градба на инвеститорите во однос на цените на локации, комуналии и на изградба, заради тоа што побарувачката зашто е мала речиси и да не влијае врз понудените цени.
